भाजपा ४०० पार असेल; पण त्यात नगरची जागा नसेल ! विखेंवर आरोपांचे बाण सोडत निष्ठावंताचे राजीनामे..

सध्या लोकसभेची रणधुमाळी सुरू असून उमेदवार आरोप प्रत्यारोप करताना पाहायला मिळतात राज्यातील सर्वात मोठा पक्ष असलेल्या भारतीय जनता पक्षाने लोकसभा निवडणुकीसाठी कंबर कसली आहे. पण गेल्या काही वर्षांमध्ये पक्षात झालेल्या इनकमिंगमुळे निष्ठावंतांवर अन्याय होत असल्याचे चित्र दिसून येत आहे. त्याची प्रचिती आता नगर दक्षिण मतदारसंघात आली आहे.

पक्षासाठी ४५ वर्षे राबलेल्या पदाधिकाऱ्यानं राजीनामा दिला आहे. प्रदेशाध्यक्ष चंद्रशेखर बावनकुळेंना पाठवलेल्या पत्रात त्यांनी विखे पाटील कुटुंबावर, विशेषतः खासदार सुजय विखेंवर गंभीर आरोप केले आहेत.

महायुतीचे उमेदवार डॉ. सुजय विखे यांनी खासदार असताना कधीही शेवगावच्या नागरिकांच्या सुविधांकडे लक्ष दिलं नाही. तसेच निवडून आल्यानंतर पाच वर्षांमध्ये त्यांनी शेवगावच्या नागरिकांशी संवाददेखील साधला नसल्याचा आरोप करत शेवगाव येथील भाजपचे सुनील रामचंद्र रासने यांनी त्यांच्या पदांचा राजीनामा दिला आहे.

रासने यांनी भाजपचे शेवगाव सरचिटणीस, शहर उपाध्यक्ष तालुका उपाध्यक्ष, तालुका सरचिटणीस अशी अनेक महत्त्वाची पदं भूषवली आहेत. अनेक वर्षापासून ते भाजपाचे कार्यकर्ते आहेत. त्यांचे वडील रामचंद्र ससाने यांनी कारसेवेमध्ये देखील सहभाग नोंदवलेला आहे. रासने यांनी प्रदेशाध्यक्षांना लिहिलेल्या पत्रातून खदखद व्यक्त केलेली आहे.

गेल्या पाच वर्षात कधी त्यांनी (सुजय विखेंनी) मतदारसंघात ढुंकून देखील पाहिलं नाही. ‘नागरिकांचे फोन न उचलणं, पार्टी म्हणजे मी आणि मी म्हणजेच मतदार संघातील जनता असा समज करून घेतल्यानं त्यांना आपला पराभव दिसत आहे. त्यामुळे डाळ व साखर वाटण्याचं काम त्यांनी केलं. परंतु डाळ व साखर वाटण्याऐवजी गुळासारखे गोड राहून मतदारांशी संवाद साधला असता तर ही वेळ आली नसती, असा खोचक टोला रासने यांनी लगावला आहे.

महसूल विभागातील जनतेच्या सेवादेखील पैसे घेतल्याशिवाय सुटत नाहीत. पाच वर्ष मतदारांशी संबंध न जपणारे खासदार हे निवडणुकीच्या काळामध्ये नागरिकांना साखर व डाळ वाटणे, मतदार संघातील महिलांसाठी शिर्डी व शनिशिंगणापूर दर्शन, लहान मोठे सांस्कृतिक कार्यक्रम घेऊन मतदारांशी संवाद साधण्याचा केविलवाणा प्रयत्न विखे परिवार करत असल्याचा आरोप रासने यांनी केला आहे. पदाधिकाऱ्यांचा कार्यकर्त्यांचा भ्रमनिरास झाला आहे .

भारतीय जनता पार्टीशी संबंधित संघटना, मग त्यात संघाचे कार्यकर्ते असतील, विश्व हिंदू परिषद असेल, बजरंग दल असेल, दुर्गावाहिनी असेल, पक्षाच्या रचनेमधील सगळे पदाधिकारी असतील बूथप्रमुख, शक्ती केंद्रप्रमुख असतील, पन्नाप्रमुख असतील, यांची आठवण फक्त पाच वर्षांनी होते. शिस्तीच्या पार्टीत आपण बरं बोलण्यापेक्षा खरं बोलणं गरजेचं आहे, असा उल्लेख पत्रात आहे.

निवडणुकीच्या अगोदरच विखेंच्या पराभवाची चिन्हं दिसत आहेत. भाजप 400 जागा पार करेल, परंतु त्यात नगर दक्षिणची जागा नसणार याचं दुःख मतदारसंघात प्रत्येक कार्यकर्त्याला वाटत आहे. फक्त पैसा, दंडेलशाही यामुळे उघडपणे कोणी बोलण्यास तयार नाही, नगर दक्षिण मतदारसंघातील भाजपच्या हजारो निष्ठावंतांची भावना मी प्रातिनिधिक स्वरूपात मांडत असल्याचं उल्लेख रासने यांनी पत्राच्या शेवटी केला आहे..